បទយកការណ៍៖ ការរៀបចំវេទិកាសេដ្ឋកិច្ច និងធុរកិច្ចអាស៊ី-អឺរ៉ុបលើកទី១ នឹងបង្ហាញអន្តរជាតិឱ្យឃើញថា កម្ពុជាជាតួអង្គសំខាន់មួយសម្រាប់ការអភិវឌ្ឍពិភពលោក
មន្រ្តីជាន់ខ្ពស់ក្រសួងពាណិជ្ជកម្មបានឱ្យដឹងថា វេទិកា «សេដ្ឋកិច្ច និងធុរកិច្ចអាស៊ី-អឺរ៉ុបលើកទី១» ( 1st ASIA-EUROPE ECONOMIC AND BUSINESS FORUM ) ដែលគ្រោងរៀបចំឡើងនៅខែវិច្ឆិកា ឆ្នាំ២០២១នេះ ជាឱកាសល្អសម្រាប់អ្នកធុរកិច្ចនិងអ្នកនយោបាយ ចូលរួមចែករំលែកនិងពិភាក្សាពីកិច្ចការទាក់ទងវិស័យពាណិជ្ជកម្ម ខណៈដែលវេទិកានេះ មានការចូលរួមពីវាគ្មិនជំនាញៗនិងអ្នកជំនួញធំៗមកពីប្រទេសជាសមាជិកនៃទ្វីបអាស៊ីនិងអឺរ៉ុប ។
ឯកឧត្តម សំហេង បូរ៉ា អនុរដ្ឋលេខាធិការក្រសួងពាណិជ្ជកម្ម និងជាប្រធានលេខាធិការដ្ឋានក្រុមការងាររៀបចំវេទិកាសេដ្ឋកិច្ច និងធុរកិច្ចអាស៊ី-អឺរ៉ុបលើកទី១បានថ្លែងក្នុងបទសម្ភាសន៍ជាមួយទីភ្នាក់ងារសារព័ត៌មានកម្ពុជា AKP នៅថ្ងៃទី០៩ខែកញ្ញានេះថា វេទិកានេះនឹងមានការចូលរួមពីវាគ្មិនជំនាញៗ និងអ្នកជំនួញធំៗឡើងមកជជែកពិភាក្សាទៅលើការធ្វើពាណិជ្ជកម្មដើម្បីជំរុញឱ្យសេដ្ឋកិច្ចពិភពលោកវិលរកភាពប្រក្រតីឡើងវិញបន្ទាប់ពីការឆ្លងរាលដាលនៃជំងឺកូវីដ-១៩ និងការធ្វើពាណិជ្ជកម្មបៃតងជាដើម ដែលមានគុណប្រយោជន៍ច្រើនសម្រាប់ពិភពលោកក្នុងបរិបទបដិវត្តន៍ឧស្សាហកម្ម៤.០។ ជាមួយគ្នានេះ ឯកឧត្តម សំហេង បូរ៉ា មានសុទិដ្ឋិនិយមថា «គុណប្រយោជន៍សម្រាប់ប្រទេសកម្ពុជា វាបង្ហាញឱ្យឃើញថា កម្ពុជាយើងអាចដឹកនាំវេទិកាពិភពលោកមួយបានល្អ បានបង្កើននូវការយល់ដឹងបានច្រើនជាងមុនសម្រាប់ពិភពលោកឱ្យបានដឹងថាកម្ពុជាជាតួអង្គសំខាន់មួយសម្រាប់ការអភិវឌ្ឍពិភពលោកយើងតទៅមុខទៀត។ យើងជាប្រទេសតួចមួយមែន ជាប្រទេសដែលមានវោហារធំ មានទឹកចិត្តជួយជំរុញការអភិវឌ្ឍពិភពលោកឱ្យកាន់តែរីកលូតលាស់»។
បើតាមឯកឧត្ដម សំហេង បូរ៉ា វេទិកានេះវាជាឱកាសសម្រាប់កម្ពុជាបង្ហាញដល់ប្រទេសនៅទ្វីបអាស៊ី និងអឺរ៉ុបជាពិសេសពិភពលោកផ្ទាល់ឱ្យស្គាល់ប្រទេសកម្ពុជាជាប្រទេសមួយដែលរីកចម្រើនដល់កម្រិតមួយអាចរ៉ាប់រងទទួលធ្វើជាម្ចាស់ផ្ទះកិច្ចប្រជុំកម្រិតអន្តរជាតិ ជាប្រទេសមានសុវត្ថិភាព បើទោះកូវីដញ៉ាំញីដល់សុខភាពប្រជាពលរដ្ឋនិងប៉ះពាល់សេដ្ឋកិច្ចគ្រួសារ និងសេដ្ឋកិច្ចជាតិខ្លាំងក្លាក្ដី ប៉ុន្តែកម្ពុជាក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន បានខិតខំបើកយុទ្ធនាការចាក់ថ្នាំបង្ការកូវីដ-១៩ជូនប្រជាពលរដ្ឋ បានច្រើនរហូតជាប់ចំណាត់ថ្នាក់លេខពីរក្នុងចំណោមប្រទេសអាស៊ានទាំង១០។ ចំពោះការ ខិតខំដើម្បីការពារសុខុមាលភាពពីការរាតត្បាតនៃជំងឺកូវីដ-១៩នេះត្រូវបានឯកឧត្តម សំហេង បូរ៉ា អនុរដ្ឋលេខាធិការក្រសួងពាណិជ្ជកម្មនិងប្រធានលេខាធិការដ្ឋានក្រុមការងាររៀបចំវេទិកាសេដ្ឋកិច្ច និងធុរកិច្ចអាស៊ី-អឺរ៉ុបលើកទី១ចាត់ទុកថា ជាចំណុចពិសេសមួយទៀតដែលពិភពលោកអាចមើលឃើញថា ប្រទេសកម្ពុជាជាប្រទេសមានសុវត្ថិភាពការពារកុំឱ្យមានការឆ្លងរាលដាលពីជំងឺកូវីដ-១៩បានល្អ ហើយអ្នកទេសចរបរទេសអាចនឹងមានទំនុកចិត្តចង់មកទស្សនាប្រទេសកម្ពុជា។
ពាក់ព័ន្ធនឹងការរៀបចំធ្វើម្ចាស់ផ្ទះនៃកិច្ចប្រជុំអាស៊ី-អឺរ៉ុបលើកទី១៣ (ASEM 13) របស់កម្ពុជានេះដែរ ឯកឧត្ដម លុយ ដាវីត រដ្ឋលេខាធិការក្រសួងការបរទេស និងសហប្រតិបត្តិការអន្ដរជាតិ អនុប្រធានប្រចាំការគណៈកម្មាធិការជាតិ និងជាអនុប្រធានលេខាធិការដ្ឋានរៀបចំ កិច្ចប្រជុំកំពូលអាស៊ី-អឺរ៉ុបលើកទី១៣ ក្នុងបទសម្ភាសន៍ជាមួយទីភ្នាក់ងារសារព័ត៌មានកម្ពុជា AKP នាពេលកន្លងទៅបានលើកឡើងថា កិច្ចប្រជុំកំពូលអាស៊ី-អឺរ៉ុបហៅកាត់ថា (ASEM) ដែលកម្ពុជាធ្វើជាម្ចាស់ផ្ទះនេះជាឱកាសសម្រាប់ថ្នាក់ដឹកនាំ ជាពិសេសថ្នាក់ដឹកនាំអញ្ជើញមកពីទ្វីបអឺរ៉ុបចំនួន៣០ប្រទេស។ ឯកឧត្តមរដ្ឋលេខាធិការក្រសួងការបរទេសបានបញ្ជាក់ថា «ថ្នាក់ដឹកនាំមកពីអឺរ៉ុបទាំងនោះនឹងមកឃើញប្រទេសកម្ពុជាយើងពិតប្រាកដ តើអភិវឌ្ឍន៍ប្រទេសដល់ណាហើយ ហើយប្រទេសយើងដែលគាត់ធ្លាប់ឮ គាត់អាន គាត់ឮតាមកាសែតហ្នឹងថា ប្រទេសដែលរ៉ាំរ៉ៃដោយសង្គ្រាមស៊ឺវិលរាប់សិបឆ្នាំនេះ ឥឡូវនេះក្លាយជាប្រទេសមួយដែលមានសុខសន្តិភាពពេញលេញហើយ ក៏ក្លាយជាប្រទេសមួយដែលជាម្ចាស់ផ្ទះនៃកិច្ចប្រជុំដ៏ធំមួយនេះ។ នេះជាអ្វីដែលជាមោទនភាពរបស់យើង»។
សូមជម្រាបជូនថា កិច្ចប្រជុំកំពូលអាស៊ី-អឺរ៉ុបលើកទី១៣ (ASEM13) ដែលកម្ពុជារៀបចំធ្វើជាម្ចាស់ផ្ទះតាមប្រព័ន្ធអនឡាញ នឹងប្រព្រឹត្ដទៅ នាថ្ងៃទី២៥-២៦ ខែវិច្ឆិកា ឆ្នាំ២០២១ខាងមុខនេះ ដែលក្នុងកិច្ចប្រជុំនេះដែរ ក៏មានវេទិកាអមចំនួន៦ផ្សេងទៀត ក្នុងនោះរួមមាន វេទិកាអាស៊ី-អឺរ៉ុប ស្តីពីស្ត្រី សន្តិភាព និងសន្តិសុខ (Asia-Europe Forum on Women, Peace & Security) កិច្ចប្រជុំភាពជាដៃគូសភាអាស៊ី-អឺរ៉ុប លើកទី១១ (11th Asia-Europe Parliamentary Partnership Meeting, ASEP11) បុណ្យវប្បធម៌អាស៊ី-អឺរ៉ុប (ASEM Cultural Festival 2020) កិច្ចប្រជុំកំពូលថ្នាក់ដឹកនាំវ័យក្មេងនៃមូលនិធិអាស៊ី-អឺរ៉ុប (ASEF Young Leaders Summit) កិច្ចពិភាក្សាតុមូលក្រុមនិពន្ធនាយកសារព័ត៌មាន នៃមូលនិធិអាស៊ី-អឺរ៉ុប លើកទី១០ (10th ASEF Editors' Roundtable, ASEFERT 10) និងវេទិកាធុរកិច្ច និងសេដ្ឋកិច្ចអាស៊ី-អឺរ៉ុប លើកទី១ (1st Asia-Europe Economic & Business Forum, AEEBF1)។
ជាមួយគ្នានេះផងដែរ ឯកឧត្តម លុយ ដាវីត ក៏បានបន្ថែមថា «ផលប្រយោជន៍ យើងអាចទាក់ទាញបានពីកិច្ចប្រជុំនេះផលប្រយោជន៍ធំ ទី១គឺបង្ហាញពីសមត្ថភាពរបស់យើង ទី២ បង្ហាញពីអរិយធម៌និងវប្បធម៌ដ៏វ័យចំណាស់របស់យើង ហើយដែលយើងអាចទាក់ទាញបាននូវទេសចរណ៍ច្រើន ហើយនិងវិនិយោគច្រើន។ ខ្ញុំជឿជាក់ថា ធនធានមនុស្សដែលយើងមានគឺអាចរៀបចំកិច្ចប្រជុំបានល្អ»៕
ខ្លឹមសារទាំងស្រុងពី ៖ AKP
